Sábháilteacht agus Slándáil

Coireacht

Tá leibhéil choireachta i dTonga sách íseal áfach tá mionchoireacht coitianta agus tarlaíonn eachtraí robálacha, ionsaithe foréigneacha agus ionsaithe gnéasacha. Méadaíonn rioscaí slándála tar éis thitim na hoíche, seachain taisteal leat féin san oíche nó taisteal chuig áiteanna iargúlta.​

Molaimid duit réamhchúraimí bunúsacha a ghlacadh agus tú ag taisteal chuig Tonga:

• Ná bíodh do chárta creidmheasa, ticéid taistil agus airgead á n-iompar agat ag aon am amháin - fág airgead tirim breise agus earraí luachmhara in áit shábháilte.
• Ná hiompar do phas murach go bhfuil géarghá leis agus fág cóip de do phas (agus cáipéisí taistil agus árachais) le do theaghlach nó le cairde sa bhaile.
• Seachain suimeanna móra airgid a thaispeáint go poiblí agus ná bain úsáid as Uathmheaisíní Bainc sa dorchadas, go háirithe má bhíonn tú i d’aonar. Seiceáil nach bhfuil aon duine do do leanúint agus tú i ndiaidh do chuid gnó a chur i gcrích.
• Coinnigh súil ghéar ar do chuid giuirléidí pearsanta agus coinnigh greim orthu in áiteanna poiblí.
• Seachain sráideanna agus staighrí dorcha gan soilse, agus déan socrú go mbaileofar agus go bhfágfar thú chomh gar agus is féidir do bhealach isteach d’óstáin nó d’árasáin

An Dúlra agus an Aeráid

Creathanna talún agus bolcáin

Tá Tonga suite i gcrios atá gníomhach go seismeach, rud a bhféadfadh creathanna talún agus gníomhaíocht bholcánach a bheith mar thoradh air. Chuaigh brúchtadh bolcánach agus súnámaí Hunga Tonga-Hunga Ha'apai i bhfeidhm go mór ar chodanna de Tongatapu agus ar oileáin eile in aice láimhe i mí Eanáir 2022 agus tá siad ag téarnamh fós. Coimeád súil ar na meáin le haghaidh na bhforbairtí is déanaí agus lean treoracha na n-údarás áitiúil. 

Stoirmeacha trópaiceacha agus Cioclóin

I dTonga, táthar ag súil le gaotha láidre ó thús mhí na Samhna go dtí deireadh mhí Aibreáin, agus is féidir le cuid acu éirí ina gcioclóin. I rith an ama seo, ceaptar go mbeidh dianbháisteach agus tuilte ann agus sciorrthaí talún ina dhiaidh sin. Mar sin féin, is féidir le stoirmeacha trópaiceacha agus cioclóin tarlú i rith na bliana.

Moltar duit monatóireacht a dhéanamh ar nuashonruithe aimsire áitiúla agus idirnáisiúnta ón Eagraíocht Dhomhanda Mheitéareolaíochta (EDM), nó Sheirbhísí Meitéareolaíochta Tonga – Aireacht MEIDECC  ​, nó ó shuíomh gréasáin Sheirbhís Meitéareolaíochta Fhidsí​.​

Snámh

Glac le comhairle áitiúil sula dtéann tú ag snámh. Is féidir le sruthanna cuilitheála láidre tarlú nuair a bhíonn briseadh ann sa sceir. Tharla timpistí marfacha. Tá smionagar sa ghaineamh agus san uisce mar thoradh ar bhrúchtadh bolcánach Hunga Tonga-Hunga Ha'apai agus súnámaí a tharla dá bharr. Tabhair aire bhreise agus tú ag snámh.

LADTAI+ Taisteal

Tá coir déanta as gníomhaíocht chomhghnéis idir fir, bíodh is gur annamh a chuirtear an dlí i bhfeidhm.

Taisteal ar bhóithre

Is féidir le tiomáint i dTonga a bheith contúirteach, go háirithe san oíche mar gheall ar dhroch-shoilsiú sráide agus bóithre nach gcoinnítear caoi orthu.​ Coimhéad coisithe agus ainmhithe ar na bóithre.

Dlíthe agus Gnásanna Áitiúla

Ná déan dearmad go mbeidh feidhm leis na dlíthe áitiúla ortsa mar chuairteoir, agus is fútsa a bheidh sé cloí leis na dlíthe sin. Bí ar an eolas agus léirigh meas ar ghnásanna, traidisiúin agus cleachtais áitiúla toisc go bhféadfaí a cheapadh go bhfuil d’iompar míchuí, naimhdeach nó mídhleathach fiú.

Cuireann reachtanna Sabóideacha srian docht ar ghníomhaíochtaí Dé Domhnaigh.

Sláinte

Fiafraigh de do dhochtúir i bhfad sula dtaistealaíonn tú an dteastaíonn aon vacsaíniú le haghaidh na tíre seo. Molaimid duit árachas taistil cuimsitheach a ghlacadh roimh thaisteal duit.

Tá baol ann ó ghalair muiscít-iompartha, lena n-áirítear fiabhras deinge. Ba cheart duit bearta cosanta a ghlacadh le greamanna muiscíte a sheachaint.

Tá áiseanna sláinte i dTonga bunúsach. D’fhéadfaí go mbeadh gá le haslonnú leighis ó Tonga le haghaidh fadhbanna leighis neamhghnácha.

Uisce

Moltar go láidir uisce a fhiuchadh agus gan ach uisce i mbuidéil a ól.

Eolas Breise

Riachtanais iontrála (víosa/pas)

Ní mór do shealbhóirí an phas Éireannaigh na riachtanais seo a leanas a chomhlíonadh le go mbeidh siad in ann dul isteach i dTonga:

1. Ticéad ar aghaidh (nó ticéad fillte) a bheith acu chuig tír a bhfuil víosa nó cead bailí agat dul isteach inti;
2. Pas a bheith acu atá bailí ar feadh sé (6) mhí ar a laghad tar éis an dáta imeachta atá beartaithe ó Thonga; Ní féidir paschártaí a úsáid;
3. Cistí leordhóthanacha a bheith acu le bheith beo orthu;

Eiseofar Cead Cuairteora 30 lá do náisiúnaigh Éireannacha a chomhlíonann critéir iontrála nuair a shroichfidh siad Tonga.