Sábháilteacht agus Slándáil

Coireacht

Fanann formhór na gcuairteoirí Éireannacha ar Oileáin Palau in ionaid saoire agus is iondúil go mbíonn siad seo an-sábháilte, ach d’fhéadfaí go dtarlódh mionchoireacht fós.

Má tá sé beartaithe agat bogadh lasmuigh de na háiteanna saoire, bí airdeallach faoi do thimpeallacht agus déan réamhchúraimí breise:

• Ná bíodh do chárta creidmheasa, ticéid taistil agus airgead á n-iompar agat ag aon am amháin - fág airgead tirim breise agus earraí luachmhara in áit shábháilte. 
• Ná hiompar do phas murach go bhfuil géarghá leis agus fág cóip de do phas (agus cáipéisí taistil agus árachais) le do theaghlach nó le cairde sa bhaile.
• Cuir do bhagáiste faoi ghlas mar réamhchúram ciallmhar i gcoinne cur isteach ar bhagáiste, goid san áireamh.

Pasanna a cailleadh nó a goideadh

Ós rud é go bhfuil an Ambasáid Éireannach is gaire fad suntasach ar shiúl i Mainile, na hOileáin Fhilipíneacha, is féidir leis an déileáil le pas a cailleadh nó a goideadh a bheith thar a bheith míchaoithiúil agus is féidir go dtógfadh sé am lena réiteach.

Coireanna a thuairisciú

Más íospartach coireachta thú agus ar Oileáin Palau, déan an choir a thuairisciú do na póilíní áitiúla láithreach. Féadfaidh tú teagmháil a dhéanamh le hAmbasáid na hÉireann i Mainile má bhíonn cabhair de dhíth ort.

Tiomáint

Bí cúramach agus tú ag tiomáint, go háirithe san oíche. Tarlaíonn timpistí tromchúiseacha tráchta ar bhóithre go minic agus bíonn saoráidí leighis éigeandála teoranta. Faigh comhairle áitiúil sula rachaidh tú amach. Más mian leat a bheith ag tiomáint, beir leat do láncheadúnas tiomána Éireannach agus cinntigh go bhfuil árachas leordhóthanach agus ábhartha agat.

Dlíthe agus Gnásanna Áitiúla

Ná déan dearmad go mbeidh feidhm leis na dlíthe áitiúla ortsa mar chuairteoir, agus is fútsa a bheidh sé cloí leis na dlíthe sin. Bí ar an eolas agus léirigh meas ar ghnásanna, traidisiúin agus cleachtais áitiúla toisc go bhféadfaí a cheapadh go bhfuil d’iompar míchuí, naimhdeach nó mídhleathach fiú.

Drugaí mídhleathacha

Tá pionóis throma ann do gach cion drugaí.

Alcól

Is é 21 bliain an aois dhlíthiúil óil ar Oileáin Palau. Tá sé mídhleathach alcól a ól go poiblí, ach amháin in áitreabh ceadúnaithe.

Toitíní Leictreonacha

Tá sé mídhleathach toitíní leictreonacha a cheannach, a chaitheamh nó iad a bheith i do sheilbh agat laistigh d’Oileáin Palau.

Uachtair Ghréine

Ní cheadaítear uachtar gréine atá tocsaineach do sceir a thabhairt isteach go hOileáin Palau, agus gabhfar seilbh air ar theacht don chuairteoir. Tá pionóis ann freisin as uachtair ghréine atá tocsaineach do sceir a mhonarú, a allmhairiú lena ndíol, nó a dhíol.

Tubaistí agus Aeráidí Nádúrtha

Cioclóin

Bíonn séasúr monsún Oileáin Palau ann idir Iúil agus Deireadh Fómhair. Ba cheart duit monatóireacht a dhéanamh ar nuashonruithe aimsire áitiúla agus idirnáisiúnta ón Eagraíocht Mheitéareolaíochta Dhomhanda agus ó Ghníomhaireacht Mheitéareolaíochta na Seapáine agus aon treoracha a eisíonn na húdaráis áitiúla a leanúint.

D'fhéadfaí moill nó stop a chur le heitiltí isteach agus amach as ceantair atá buailte agus ba cheart duit a bheith ar an eolas go bhféadfadh eitiltí atá ar fáil líonadh go tapa.

Eolas Breise

Riachtanais iontrála (víosa/pas)

Víosaí

Eiseofar Víosaí Turasóireachta 30 lá ar theacht isteach sa tír agus d’fhéadfaí iad a shíneadh laistigh de 7 lá roimh ré le ceadú an Cheannasaí Inimirce ar tháille US$50.00 roimh dháta éagtha an víosa. (Nóta: Uasmhéid de 90 lá: 30 lá ar theacht isteach sa tír móide 2 shíneadh, le táille US$50.00 in aghaidh an tsínte. Ina dhiaidh sin is gá do chuairteoirí an tír a fhágáil).

Le haghaidh tuilleadh eolais faoi thréimhse fanachta leathnaithe ar Oileáin Palau, cuir glaoch ar an mBiúró Inimirce ag (680) 488 – 2498 nó 2678, Dé Luain go hAoine idir na huaireanta 7:30r.n. – 4:30i.n. nó seol fiosrúcháin ar ríomhphost chuig imm@palaunet.com.​

Foirm Iontrála Oileáin Palau

Ní mór do gach taistealaí Foirm Iontrála Oileáin Palau ar líne a chomhlánú laistigh de 72 uair an chloig tar éis dóibh teacht go hOileáin Palau. Is féidir foirm amháin a chur isteach do ghrúpaí teaghlaigh (http://www.palautravel.pw/)​

Pas

Bí cinnte go bhfuil do phas bailí ar feadh sé mhí ar a laghad tar éis dheireadh do thurais chuig Oileáin Palau. Ní féidir paschártaí a úsáid.

Ba chóir duit fótachóip de do phas agus de do chárta teachta a bheith leat i gcónaí i rith d'fhanachta ionas gur féidir leat fianaise ar d'aitheantas a thaispeáint má iarrann na póilíní ort é, mar shampla

Sláinte

Saoráidí leighis

Má tá cóir leighis éigeandála de dhíth ort le linn do thurais, cuir scairt ar 911 agus iarr cabhair orthu. Ba cheart duit teagmháil a dhéanamh le do chomhlacht cúnaimh árachais/leighis a luaithe is a atreoraítear thú chuig saoráid leighis le haghaidh cóireála.

Is leor áiseanna sláinte in Oileáin Palau le haghaidh gnáthchúraim leighis, ach tá siad teoranta ó thaobh infhaighteachta agus cáilíochta de. Is minic a bhíonn dochtúirí agus ospidéil ag súil le híocaíocht láithreach airgid as seirbhísí sláinte.

Is é an t-aon ospidéal náisiúnta ná ’Ospidéal Náisiúnta Belau ', sa phríomhchathair, Koror, ar féidir teacht air a bheag nó a mhór níos lú ná dhá uair an chloig ó fhormhór na láithreacha. Tá an t-aon seomra hipearbarach ar Oileáin Palau ag an ospidéal, chomh maith le seomra obrádlainne, meaisíní scagdhealaithe agus clinic othar seachtrach. Tá cógaslann san ospidéal freisin a dháileann cógais bhunúsacha.

Tá líon beag clinicí príobháideacha agus ionaid sláinte pobail a chuireann seirbhísí bunúsacha cúraim phríomhúil agus phráinneach ar fáil.

D'fhéadfadh riochtaí sláinte tromchúiseacha, a bhíonn cur san ospidéal nó aslonnú de dhíth mar thoradh orthu, a bheith an-chostasach. Tá cóireáil éigeandála nó cóireáil do riochtaí tromchúiseacha teoranta agus mar sin d'fhéadfaí tú a aslonnú ó thaobh leighis de chuig tír eile. D'fhéadfadh sé seo am a ghlacadh chun socrú a dhéanamh agus is féidir leis na costais dul i méid go tapa, mar sin déan cinnte go bhfuil árachas sláinte taistil leordhóthanach agus airgead inrochtana agat chun costas d’aon chóir leighis thar lear agus d’aon aisdúichiú a chumhdach.

Imdhíonadh

Teastaíonn imdhíontaí Calair agus an Fhiabhrais Bhuí dóibh siúd a thagann ó cheantair ionfhabhtaithe.