Nósanna Imeachta Tuairiscithe CTE

Éilítear ar eagraíochtaí a fuair deontais faoin gClár Tacaíochta Eisimirceach (CTE) an méid seo a chur isteach i leith gach tionscadail:

• Tuairisc ina bhfuil Cur Síos ar an Dul Chun Cinn, agus
• Cuntais Airgeadais (féach an nóta treorach ar leithligh)

Tá gá le tuairisciú stuama ionas gur fearr a thuigfidh na measúnóirí deontais an obair a dhéanann eagraíochtaí agus an tionchar a imríonn siad. Is é an taithí atá againn go mbíonn na tuarascálacha is fearr bunaithe ar mhonatóireacht ardchaighdeán a dhéanann eagraíochtaí agus go n-úsáidtear teanga agus méadracht shoiléir iontu chun tionchar na hoibre agus tionchar an maoiniú CTE a thaispeáint.

Ní mór d'eagraíocht tuairisciú maith a dhéanamh chun an tionchar a imríonn obair na heagraíochta a thuiscint agus, i dteannta le nósanna imeachta monatóireachta, féadfaidh sé cabhrú le heagraíochtaí réimsí laige a fheiceáil, ó easpa éifeachtachta go dtí fadhbanna níos tromchúisí cosúil le calaois agus mí-bhainistiú airgeadais.

Ina theannta sin, cabhraíonn an mheastóireacht thréimhsiúil le heagraíochtaí ceachtanna a fhoghlaim agus a bheith i mbun pleanála (i measc feidhmeanna eile). Moltar d'eagraíochtaí meastóireacht rialta a dhéanamh ar thionscadail shonracha ar mhaithe le feabhas a chur ar éifeachtacht agus éifeachtúlacht a gcuid oibre. Forchoimeádann an Roinn Gnóthaí Eachtracha agus Trádála an ceart chun meastóireacht rialta a dhéanamh ar thionscadail nó eagraíochtaí atá á maoiniú.

Ba chóir go mbeadh próisis tuairiscithe foriomlána don CTE dírithe ar a léiriú go mbaintear amach torthaí – ní ar a léiriú gur soláthraíodh na gníomhaíochtaí agus na haschuir go léir mar a bhí beartaithe san iarratas. Go háirithe, ní mór go leagfar amach go soiléir sna tuairiscí faoin dul chun cinn an méid a baineadh amach i gcomparáid leis an méid a bhí beartaithe, agus go míneofar iontu aon neamhréireacht, go háirithe más rud é nár baineadh amach gníomhaíochtaí/torthaí éigin a bhí beartaithe. Mar sin, ní mór cuspóirí réalaíocha a leagan síos, díriú orthu agus tuairiscí a thabhairt orthu. Ba cheart na cuspóirí sin a bheith ag teacht le spriocanna straitéiseacha na heagraíochta agus, i ngach cás, ba cheart na cuspóirí sin a bheith:

• Sonrach – dírithe ar réimse sainiúil le haghaidh feabhsúcháin nó tionchair.
• Intomhaiste – leag síos nó mol táscaire maidir le dul chun cinn.
• Cuí – ag teacht le mórspriocanna agus riachtanais na heagraíochta
• Réalaíoch – luaigh cé na torthaí is féidir a bhaint amach go réalaíoch, ar bhonn na n-acmhainní atá ar fáil go réalaíoch.
• Faoi cheangal ama – sonraigh cén uair is féidir an toradh nó na torthaí a bhaint amach

Is ea is éasca a bheidh sé tuairisciú don CTE má bhíonn cuspóirí agaibh a thagann leis an gcreat sin thuas (creat SMART, mar a thugtar air sa Bhéarla). Is iad na buntáistí a bhaineann le cuspóirí dá leithéid i gcás measúnóirí deontais CTE ná go leagtar amach go soiléir cén áit ar caitheadh an maoiniú agus cén toradh a bhí air. Is iad na buntáistí a bhaineann leo i gcás eagraíochtaí ná go gcabhraíonn an creat le léargas a thabhairt ar na rudaí a oibríonn agus na rudaí nach n-oibríonn ar bhealach soiléir, inchomparáide.

Ba cheart go ndéanfaí idirdhealú soiléir sa tuairisciú don CTE idir aschuir agus torthaí. Léiríonn na haschuir dúinn céard a táirgeadh de bharr gníomhaíochtaí eagraíochta. Má dhéantar na haschuir a thomhais, ní hé sin le rá go bhfuil léargas á thabhairt ar luach ná tionchar na seirbhísí do chliaint, áfach. Ar an lámh eile, is é is toradh ann an leibhéal feidhmíochta nó gnóthachtála a tharla de bharr na gníomhaíochta nó na n-aschur seirbhísí a chuir eagraíocht ar fáil.  Is táscaire níos oiriúnaí iad na torthaí ar éifeachtacht agus is fearr is féidir a chinneadh leo cé chomh maith a d'éirigh leis an bpróiseas.

Níor cheart gur próiseas inmheánach ná próiseas reachtúil amháin a bheadh i gceist leis an tuairisciú, agus ceann de na bealaí is fearr chun obair agus tionchar na heagraíochta a léiriú is ea tuarascáil bhliantúil a ullmhú. Is bealach iontach iad tuarascálacha bliantúla chun freastal ar chineálacha páirtithe leasmhara éagsúla, idir lucht maoinithe, na meáin agus bhur gcliaint. Is féidir le daoine a fheiceáil cad a rinne sibh i rith na bliana agus is féidir leo an tuarascáil a úsáid mar áis tagartha. Is deis iontach í an tuarascáil freisin i gcomhair feachtas beag cumarsáide ar na meáin shóisialta agus chun ócáid seolta a chur ar bun. Thairis sin, is gné ríthábhachtach í tuarascáil bhliantúil stuama a mheasann na measúnóirí deontais agus eagraíochtaí á measúnú acu.